सिंगापुरमा सुजाताले उडाउँदैछिन् सरकारी पैसा

६ मंसिर, काठमाडौं । आफ्ना बाबु काँग्रेस सभापति गिरिजा प्रसाद कोइरालाको उपचारमा सहयोग गर्न गएकी उपप्रधान एवं परराष्ट्रमन्त्री सुजाता सिंगापुरमा विलसी दिनचर्या बिताउँदैछिन् । स्रोतअनुसार उनी एक सातादेखि पिताको उपचारमा सहयोग गर्न भन्दा विलासी होटल, कार र खानपानमा रमाइरहेकी छन् । कोइरालासँगै गएका उनका चिकित्सकद्वय मनबहादुर केसी र जिजुनाथ पोखरेल, भतिजा शेखर कोइराला, स्वीय सचिब शेखर थापा र निजी सुरक्षाकर्मी महेन्द्र मरासिनी आफैले खोजेर सामान्य होटलमा बस्दै आएका छन् । सिंगापुरमा उनीहरुको यातायात खर्चसमेत सामान्य छ ।


कोइरालपुत्री सुजाता भने ‘उपप्रधानमन्त्रीलाई स्तरीय होटल चाहिन्छ’ भन्दै सिंगापुरको महङ्गोमध्ये पर्ने डिलक्स होटलमा बस्दै आएकी छन् । उनी डिलक्स होटलको पनि महङ्गो कक्ष ‘प्रेसिडेन्सियल स्विट’ मा बस्दै आएकी छन् ।
सुजाता दैनिक १४ सय अमेरिकी डलर (१ लाख ५ हजार रुपैयाँ) पर्ने स्विटमा बसेको जानकारी परराष्ट्र मन्त्रालय स्रोतले जनाएको छ ।
होटलमा मात्र नभई सुजाताले भाडामा लिएको कार पनि अत्यन्त विलासी छ । उनले संसारमै महङ्गोमध्ये पर्ने लेमोनिज कार लिएर चढ्दै आएकी छन् । सुजाताले सात दिनदेखि भाडामा चढिरहेको लेमोनिज कारको दैनिक भाडा २ हजार सिंगापुर डलर (करिब २ लाख रुपैयाँ) छ ।
तत्कालीन राजा ज्ञानेन्द्र शाहीकालमा रोयल्स रोयस र लमोजिन कार झिकाउँदा विवादमा परेका थिए । उक्त लेमोनिज कार हाल राष्ट्रपति डा. रामबरण यादवले चढ्छन् ।
सुजाताको जीवनयापन विलासीमात्र छैन, सरकारी ढुकुटीबाट उपहार दिने सवालमा पनि उत्तिकै दानी छन् । उनले भारत, पोर्चुगल र इजिप्ट भ्रमणका क्रममा भेटेका विदेशी समकक्षीलाई ५ लाख ५ लाख २६ हजार रुपैयाँ बराबरका चाँदीका प्लेट उपहार दिएकी थिइन् । उपहार प्लेटमा उनले आफ्नो नाम र पद लेख्ने गरेकी छन् । यसअघि नपाली मन्त्रीहरुले नेपाली परम्परागत हस्तकला र कलात्मक सामान उपहार दिने गर्थे । ती सामान सुजाताले दिएका चाँदीका प्लेटभन्दा अत्यन्त सस्तो पर्दछन् ।



साभार:नागरिक दैनिक